بقلم : أيمن طه اعلن مطعم مشهور وعن الكلام مسئول كل المسئولية ان شباب مصر من زمان وهى لا تعرف كلمة فتنة طائفية بدليل ان محمد وجورج واحمد واسكندر لسه واكلين عنده فول وطعمية كما اكد اسماعيل ملك البلاى ستيشن تلك المعلومات واضاف للاهمية ان محمد وجورج واحمد واسكندر يوماتى يلعبوا عنده فى الدكانة دية واضاف محسن القهوجى ان محمد وصاحبه بولس على القهوة بصفة يومية كذلك ميخائيل مع عبد الرحمن شاربين شاى بحليب وكنت عاملة بادية وكان معاهم العصر محمد وجورج واحمد واسكندر وانا وتادرس قبل ما يستلم منى الوردية واضاف شاهد عيان ان وقت الصلاة كان موريس ينتظر خالد امام المسجد فى العربية ولما خرج فات على باقى الشلة وراحوا يتبرعوا بدمهم فى مستشفى السرطان اللى جانبية واعترف ان ام احمد متعرفش تشوف مسلسل الواد مهند غير مع ام جورج اللى ساكنة فوقية كذلك اضافت ام موريس وهى تنظر لام محمود وقالت لها هتروحى العمرة وهقبضك الجمعية والمقدس بشاى كان مستنى سيد يخرج من الجامع يسنده لغاية الدكتور عشان تعبان شوية كما تم العثور على سى دى بسيارة صاحبهم وليم للفنان سامى يوسف وبه اغانى دينية مما دعا صاحبهم الاخر عبد الله للاعتراف بحبه للفنان هانى رمزى فى كل اعماله الكوميدية الجدير بالذكر ان الدورات الرمضانية ابلغت عن اشتراكهم جميعا فى كل دورة سنوية والهداف كان الفونس واحسن حارس عبد النبى والفائز باللقب فريق اصحاب مصرية كما اوضحت ان هؤلاء الشباب من شدة حبهم لبعض لا نعرف من فيهم الاهلوية ومن زملكاوية مما دعا محمد وجورج واحمد واسكندر الى عقد جلسة ودية يحسدوا فيها يحيى على لاميس التركية الامر الذى اصاب امينة وسعاد ومارى وفوليت بصدمة اصل اسرارهم مع بعض من الاعدادية فا تم وضع خطة سريعة امينة وسعاد استلفوا من فوليت ومارى عشان يجيبوا للجو هدية وفوليت ومارى راحو الكنيسة وقالوا ل جورج واسكندر وصلونا عشان انهاردة زحمة شوية واتقابلوا كلهم بس مش بالصدفة واتمشوا مع بعض ع النيل بضحكة وفرحة وسعادة هنية والاربعة البنين مع الاربعة البنات راحوا مطعم مشهور وعن الكلام مسئول كل المسئولية اعلن وقال ان مش معقولة الناس دية بالحب اللى ادام عنية تعرف تعمل فتنة طائفية كان معكم ايمن طه من امام مطعم مشهور حب يقول مش معقول المصريين يعرفوا الكلمة دية

الفلم الفاسد

بقلم :  ايمن طه

بمناسبة بدء موسم فضائح الاسماء اللى سرقونا 

  يسر افلام الاخوة النصابين والصعرانة 

ان تقدم لجمهورنا والناس اللى فهمانا

قريبا -- على يوتيوب والمواقع الفرحانة

الفيلم -- الفاسد 4 فى الزنزانة

بطولة -- العادلى وعز والمغربى وجرانة

قصة -- كفاح لشعب ضد طبقة فسدانة

سيناريو -- ديكتاتور من زمان بفكره بيتحدانا

حوار -- اتقال كتير ووعود للناس الغلبانة

انتاج -- السلطة والنفوذ بالاشتراك مع ناس نهبانا

توزيع -- الحكومة جروب لخيانة الامانة

تصوير -- الطيارة من قصر الرياسة هربانة

مونتاج -- للشهدا وهى فى دمها غرقانة

كلاكيت -- اول مرة ثورة شباب بيحبك كسبانة

موسيقى تصويرية -- للضرب والرصاص وقنابل مسيلة للدموع فى هوانا

غناء -- يا حببتى يا مصر يا مصر كانت دايما جوانا

ساعد فى الاخراج -- اسامى كتير ممنوعة م السفر والقايمة معانا

اخراج -- الخونة دول براءة استحالة والشهود دمانا